الصورة دي ناس كتار بيخدموا الفقرا مشيرينها وكاتبين تحتها " عن خجل وفرحة طفلة فقيرة بحذاء جديد .. ربنا مايحرم حد محتاج " وبما انها { اتنشرت فعلاً } عايز آقول الجملة اللي المفروض كانت تتكتب : " عن خجل وفضيحة طفلة فقيرة بسبب حذاء جديد ربنا مايفضح محتاج " البنت دي لما تكبر وتشوف الصورة دي هتلعن اليوم اللي اتحوجت فيه للناس ومش بعيد تلعن ربنا نفسه اللي سمح انها تتولد فقيرة وأهلها مايبقاش معاهم تمن جزمة ويجي ناس يقولوا على نفسهم انهم بتوع ربنا يشحتوها جزمة جديدة ويصوروها ويعملوا عليها أفلام علشان يلموا فلوس " يساعدوا بيها محتاجين تانيين " * اللي قال : متى صنعت صدقة فلا تُعَرِّف شمالك ماتفعله يمينك كان عايز يحقق هدفين ١- مايخليناش نتباهى باللي بنعمله .. إذا كانت إيدينا الشمال مش هتعرف اللي بتعمله إيدينا اليمين أكيد الناس مش هتعرف اللي بنعمله خالص وربنا بس اللي بيشوف اللي بيحصل في الخفاء هيشوف وهيجازينا ٢- مايخليش اللي بياخد الصدقة يتفضح لأن إذا كانت الصدقة في الخفاء ومش عايز اللي بيتصدق يعلن عنها أكيد اللي بيتلقى الصدقة دي هيفضل غير معروف وغير مُعلَن عنه وفي الخفاء . لكن إحنا بقينا لانتصدق في الخفاء ولا مانفضحش الشخص اللي بيتلقى الصدقة بنتصور جنب البطاطين اللي هنوزعها على الفقرا وبناخد سيلفي جنب كراتين الرز والمكرونة اللي هنوزعهم على الغلابة وبنصور الغلابة نفسهم وهم بيتلقوا صدقاتنا يانهار اسود علينا !!! خدوا الآية دي : " لقد أهنتم الفقير " تاني .. " لقد أهنتم الفقير " تااااااني .. لقد أهننا الفقير 😔 * ثواني بس انت ليه بتظلم اللي بيصوروا الفقرا وبيجرسوهم !!! " سواء عالفيس بوك أو على الفضائيات " دول " غايتهم " يخلوا الناس يتعاطفوا مع الفقرا ويلموا فلوس مش عشان يحطوها في جيبهم لكن عشان يساعدوا بيها فقرا تانيين . • الغايات النبيلة يلزم لتحقيقها وسائل نبيلة لذلك صدق من قال : " الغاية لاتبرر الوسيلة "